Quedou un buraco i nun haberá aire
que para el puolo arrastre,
nien anxurrada que l´encha cun nata.
Hai buracos piores que galatones!...
Fondos i cun ls lhados ásparos,
guincharros a ferir
la raíç de las palabras.
cun raízes
fuortes,chena de ganas de bibir
deixa un buraco fondo,
porque arrincada por ua airaçada
a la falsa fé.
Las outras,
aqueilhas que se ban deixando morrer
porque la fuorça le bai faltando,
ls anhos le pésan ne
ls tuoros carunchosos,
ou siempre bibírun maribundas,
essas, an menos de nada, cáien-se
anque cun un airico lebe.
Apuis apodrécen spandeiradas
i deilhas naceran setas, ne l tuoro pocho.
Ah! Mas hai-las, anque cun malina,
nun se déixan secar,
lhuítan i cuntínan-le tuoros a medrar,
énchen-se de fuolhas i flores
i dan fruto l anho
anteiro.
Apuis hai un bendabal
que a la falsa fé las arrinca,
le stronca las raízes na tierra biolada,
cuscorones nácen,
guincharros quédan a doler,
la tierra sufre mas nun se queixa
porque mais árboles ténen que nacer
d´ua alma que se fui
ou cumo querie, eiqui se quedou
para nacer bida,
ua singela flor que séia…
Hai buracos
que son piores que galatones
i só las palabras deixadas,
le fazerán quecuolho!…
1 de Março de 2015 , l die que Amadeu Ferreira mos deixou
Adelaide Monteiro
Sem comentários:
Enviar um comentário